Прв пат хеликоптерски лет на Марс
За прв пат во историјата успешно е изведен лет на хеликоптер на Марс – соопшти американската агенција за вселенски летови НАСА.
Малиот хеликоптер „Инџенуити“ во понеделникот рано изутрина, успешно полетал и по кусиот лет, одново слетал на површината на „Црвената планета“, што е прв лет на едно летало над површината на друга планета во историјата на вселенските полети и истражувања.
Хеликоптерот на Марс беше префрлен со помош на роверот „Персеверанс“ што на оваа планета слета на 18 февруари во големиот кратер „Езеро“, откако претходно патуваше седум месеци.
Во НАСА оценуваат дека оваа успешна проба би можела да значи почеток за изведувања нов начин на истражувања на Марс, но и на други дестинации во сончевиот систем, како на Венера и на Титан, најголемиот месец на Сатурн.
Успешниот лет на малото летало, во лабораторијата на НАСА во близината на Лос Анџелес со аплауз и со вистински овации го имаат поздравено историскиот момент – откако од Марс ги примиле сознанијата дека леталото тешко само 1,8 кг. летало над површината на оваа планета 40 секунди, како што тоа било планирано, три часа пред изведувањето на експериментот.
Хеликоптерот летал на висина до три метри. На едно место останал 30 секунди, а потоа одново се спуштил на марсовата површина.
Роверот што го пренесе и хеликоптерот на Марс се смета за досега најнапредното вселенско возило што е испратено во вселената. На Марс роверот „Персеверанс“ треба да трага по докази за дамнешен микробиолошки живот на таа планета.
